azken berriak

2024/04/18
Langabezia tasa % 7,9ra igo da lehen hiruhilekoan EAEn (1:02 min.)

Hala ere, azken urtebeteko datuei erreparatuta, 17.800 landun gehiago izan dira, eta langabezia tasak ehuneko puntu bat egin du behera, % 8,9tik % 7,9ra.

Audiorik gabe. Langabezia tasa % 7,9ra igo da Euskal Autonomia Erkidegoan (EAE) urteko lehen hiruhilekoan, 2023ko laugarren hiruhilekoari dagokion berrikusitako datua baino zazpi hamarren gehiago (% 7,2), Eustatek ostegun honetan zabaldutako datuen arabera. Hiruhileko honetan 84.600 langabe eta 980.900 landun zenbatu dituzte. EAEko lan merkatuaren 2024ko lehen hiruhilekoko datuen arabera, 2023ko laugarren hiruhilekoan baino 1.500 landun gehiago eta 9.100 langabe gehiago daude. Azken urtean, 2023ko lehen hiruhilekotik 2024ko lehen hiruhilekora, 17.800 landun gehiago izan dira (% 1,8), eta 9.400 langabe gutxiago. Halaber, langabezia tasak ehuneko puntu bat egin du behera, % 8,9tik % 7,9ra.

2024/04/18
Aita bat eta aitona bat kondenatu dituzte, Iruñeko ikastetxe bateko irakasle bat hertsatu eta mehatx (1:46 min.)

Erruztatuek semeari eta bilobari besotik gogor heldu izana eta atzamarkada batzuk egin izana leporatu zioten irakasleari, eta bultza egin zioten.

Audiorik gabe. Aita bati eta aitona bati 18 eta sei hilabeteko espetxe-zigorra ezarri diete, hurrenez hurren, Iruñeko ikastetxe publiko bateko irakasle bat hertsatu eta mehatxatzeagatik. 30 eta 61 urteko gizonak joan den urriaren 10ean joan ziren ikastetxera, 14:30 aldera, eta irakaslea zegoen gelara sartu ziren. "Oso modu aztoratuan eta oihuka", umearekin goiz hartan izandako gertakaria aurpegiratu zioten. Epailearen ebazpenaren arabera, "erruztatuek ikasleari besotik gogor heldu eta atzamarkada batzuk egin izana leporatu zioten". Gainera, aitak "arrazista" deitu zion irakasleari, eta bultzatu egin zuen hormaren kontra jarri arte. Orduan, aitonak "harroa" eta "arrazista" deitu zion, eta bera bezalakoekin berehala amaitzen zuela esan zion, hatzaz seinalatuz. Gertakarien ondorioz, aitak 18 hilabeteko espetxe-zigorra onartu zuen, hertsapen-delitua egotzita. Bestalde, aitonak sei hilabeteko espetxe-zigorra jaso zuen mehatxu-delituagatik. Epaileak bien espetxeratzea etetea erabaki du, baldin eta aitak hiru urtean eta aitonak bi urtean deliturik egiten ez badute.